Add caption |
តែងសេចក្ដី (១)
ប្រធានៈ តាមទស្សនៈអប់រំចិត្តមួយឃ្លាចែងថា “ការបាត់បង់សម្មាទិដ្ឋិ សម្មាសង្កប្បោ គឺជាការកើនឡើងនៅអំពើបាបកម្ម” ។ ចូរពន្យល់ដោយលើកឧទាហរណ៍មកបញ្ជក់។
សេចក្ដីអធិប្បាយ
ព្រះពុទ្ធជាម្ចាស់ ដែលជាព្រះបរមគ្រូនៃយើង ព្រះអង្គរមែងអប់រំទូន្មាន ប្រៀនប្រដៅ ដល់ពុទ្ធបរិស័ទទាំងឡាយ ឱ្យចេះសង្រួមកាយវាចាចិត្ត ដើម្បីចៀសផុតអំពើអាក្រក់ ក្នុងគ្រួសារ និងសង្គមជាតិ។ ដោយបានត្រង់ត្រាប់នូវពុទ្ធឳវាទនេះហើយទើបមានទស្សនៈអប់រំចិត្តមួយចែងថា “ការបាត់បង់សម្មាទិដ្ឋិ សម្មាសង្កប្បោ គឺជាការកើនឡើងនៅអំពើបាបកម្ម”។
តើទស្សនៈនេះមានអត្ថន័យ និងខ្លឹមសារយ៉ាងដូចម្ដេចខ្លះ?
ការបកស្រាយមួយមានសេចក្ដីពិស្ដារ ព្រមទាំងក្បោះក្បាយទៅបានអាស្រ័យដោយយើងបានស្វែងយល់ន័យនៃពាក្យគន្លឹះប្រធានជាមុនសិន។ សម្មាទិដ្ឋិ គឺការយល់ឃើញត្រឹមត្រូវ ។ ឯពាក្យសម្មាសង្កប្បោ មានន័យថាសេចក្ដីត្រិះរិះត្រឹមត្រូវ ពិចារណាឃើញអ្វី ដែលមានប្រយោជន៍និងឥតប្រយោជន៍។ ចំណែកបាបកម្ម សំដៅលើអំពើអាក្រក់ អំពើអកុសល។ ប្រធាននេះមានន័យថានៅពេលណា ដែលមានការបាត់បង់ការយល់ឃើញត្រូវ និងសេចក្ដីត្រិះរិះត្រូវ នោះនឹងមានការកើនឡើង នូវអំពើអាក្រក់ជាមិនខាន។
ជាការពិតឥតបដិសេធបាន ធម្មជាតិនៃមនុស្ស តែងតែមានសេចក្ដីលោភលន់ មានចំណង់ ហើយសេចក្ដីលោភលន់នោះវាបានជំរុញឱ្យមនុស្សមានការវង្វេង ឬធ្វើឱ្យយើងបាត់បង់អស់នូវការគិតពិចារណា ការយល់ឃើញត្រូវ ដែលជាជំហានៗនាំឱ្យមនុស្សបង្កើននូវអំពើអកុសលគ្រប់បែបយ៉ាងបន្ថែមទៀត។ ជាក់ស្ដែង នៅក្នុងស្នាដៃអក្សរសិល្ប៍រឿងទុំទាវ តួអង្គទុំ និងទាវ ដោយខ្វះការយល់ឃើញត្រូវ ខ្វះការពិចារណាត្រឹមត្រូវ ជាហេតុនាំឱ្យពួកគេហ៊ានប្រព្រឹត្តអំពើ អកុសលម្ដងហើយម្ដងទៀត គឺទុំលែងស្ដាប់ដំបូន្មានគ្រូ លួចសឹកដើម្បីស្នេហា។ ឯទាវលែងគោរពប្រពៃណីជាតិក្នុងការចូលម្លប់ បង្កើតស្នេហាលួចលាក់ជាមួយទុំ លែងស្ដាប់បង្គាប់ម្ដាយ។ ចំណែកម្ដាយទាវវិញ ដោយសេចក្ដីលោភលន់ លែងគិតពិចារណាឱ្យបានត្រឹមត្រូវបង្កើតជាទោស ដែលជាអំពើបាបដ៏អាក្រក់ ដូចជាមិនស្ដាប់ពាក្យអង្វររបស់កូនក្នុងការជ្រើសរើសរើសគូស្រករ។ ម្យ៉ាងទៀតម្ដាយទាវបានបំបែកបំបាក់ ទុំ និងទាវ ដែលបានរៀបការស្របច្បាប់ ដោយបញ្ជាឱ្យអរជូន យកទុំទៅសម្លាប់យ៉ាងសាហាវបំផុត។ ដូចមានសម្ដីបញ្ជាក់ថា “ឧកញ៉ាអរជូនងួនកូនគាត់ ខឹងណាស់ខំអត់ស្ទុះម្នីម្នា ចរចេញទៅដល់ទើបស្គាល់ជា ទុំទាវនោវាមរណាពិត”។មួយវិញទៀតរឿងភូមិតិរច្ឆាន ដោយសារតែការបាត់បង់ការពិចារណ ធ្វើឱ្យខ្លួនហ៊ានប្រព្រឹត្តអំពើអាក្រក់ភ្លេចគិតពីតួនាទី បានចាប់អ្នកជាប់ពន្ធដាក់ខ្នោះ បង្អត់បាយ ដែលមានប្ដីនាងនី នាងប៊ី បំភ្លេចពាក្យសន្យារបស់ខ្លួន។ រីឯជួន និងនៅដោយខ្វះការពិចារណា មានមោទនភាពជ្រុលចំពោះជ័យជម្នះបណ្ដោះអាសន្នរបស់ខ្លួន នាំគ្នាកេណ្ឌប្រជារាស្ត្រទៅវាយបារាំងនៅកំពង់ឆ្នាំង គឺបង្ខំរាស្រ្តថា បើមិនព្រមទៅតាមខ្លួនកូនក្នុងអង្រឹងមួយក៏មិនទុកដែរ។
រួមសេចក្ដីមកនៅពេលណា ដែលគេបាត់បង់ការគិតពិចារណាត្រឹមត្រូវ និងការយល់ឃើញត្រឹមត្រូវនោះបុគ្គលនឹងបង្កើនការប្រព្រឹត្តអំពើអាក្រក់គ្រប់បែបយ៉ាង ដើម្បីបំពេញមហិច្ឆតារបស់ខ្លួនពិតប្រាកដមែន។
ឆ្លងតាមការបកស្រាយបង្ហាញឱ្យឃើញថា ទស្សនៈប្រធានពោរពេញទៅដោយអត្ថន័យល្អក្នុងការកាត់បន្ថយនូវអំពើបាប ទោះបីជាចេតនាក្ដី អចេតនាក្ដី។ ទន្ទឹមនឹងនេះគំនិតប្រធានបានចូលរួមចំណែកយ៉ាងវិសេសវិសាលបំផុត ក្នុងការលុបបំបាត់ទំនាស់ ហើយអប់រំមនុស្សឱ្យងាកមករកផ្លូវល្អគ្រប់ៗគ្នា។
No comments:
Post a Comment