អត្ថរស
ជាតម្លៃរបស់អត្ថបទអក្សរសិល្ប៍ ដែលស្ដែងឡើងតាមរយៈអត្ថន័យ និងអត្ថរូប។
អត្ថរសចែកជាបីៈ
១. បច្ចេករសៈ
ជាតម្លៃរបស់អត្ថបទអក្សរសិល្ប៍
ដែលស្ដែងឡើងសម្រាប់តាក់តែងនិពន្ធរឿងរ៉ាវផ្សេងៗក្នុងអ.សិ។
បច្ចេករសចែកជាបីប្រភេទគឺៈ
-កាព្យរសៈ
តម្លៃដែលកវីបានរចនាអត្ថបទជាពាក្យកាព្យមានសម្ផស្សសូរសព្ទពីរោះរណ្ដំណែងណង
ការរៀបរាប់ពណ៌នាអ្វីមួយឱ្យអ្នកអាន អ្នកស្ដាប់រំភើប រីករាយ តាមដំណើររឿង។
-ប្រលោមរសៈ
តម្លៃដែលកវីបានរចនាអត្ថបទជាពាក្យរាយ ធ្វើឱ្យដំណើររឿងក្ដី សកម្មភាពតួអង្គក្ដី
មានលក្ខណៈអណ្ដែតអណ្ដូង ពោរពេញដោយមនោសញ្ចេតនា ខាបអន្ទងដួងចិត្ត អ្នកអានអ្នកស្ដាប់ឱ្យរំភើបរីករាយតាមដំណើររឿង។
-នាដករសៈ
តម្លៃដែលកវីប្រើសម្រាប់សរសេររឿងល្ខោន ដោយមានការរៀបរាប់ដំណើររឿងឱ្យមានលក្ខណៈឯកភាព
ទាំងសកម្មភាព ទីកន្លែង និងពេលវេលា។
២. វិសេសរសៈ
តម្លៃរបស់អត្ថបទអក្សរសិល្ប៍ ដែលស្ដែងឡើងសម្រាប់តាក់តែងនិពន្ធរឿងល្ខោន
កំណាព្យ ល្បើក អត្ថបទផ្សេងៗ។ វិសេសរស
មានច្រើនយ៉ាងៈ
-សុន្ទរ៍រសៈ
ជាតម្លៃល្អ ដែលកវីប្រើការបង្ហាញលក្ខណៈតួអង្គតាមការពិត ឬចេះពណ៌នារូបភាព ដំណើររឿង
ធម្មជាតិ ទេសភាព និងសកម្មភាពតួអង្គបានច្បាស់លាស់ ធ្វើឱ្យអ្នកអាន អ្នកស្ដាប់
អ្នកទស្សនាពេញចិត្តសាច់រឿង។
-វិហាសរូបរសៈ
ជាតម្លៃអាក្រក់ ដែលកវីប្រើក្នុងការបង្ហាញទៅលើលក្ខណៈអាក្រក់របស់តួអង្គតាមការពិតជាក់ស្ដែង
ទាំងរូបរាងកាយ សកម្មភាព ដើម្បីបង្កើតនូវសោភណភាពនៃរឿង។
-វិសិដ្ឋរសៈ
ជាតម្លៃដែលកវីប្រើនូវការបង្ហាញសកម្មភាពអស្ចារ្យរបស់តួអង្គ
ក្នុងការធ្វើពលីកម្មអ្វីមួយ ដែលមនុស្សធម្មតាធ្វើមិនបាន។
-វីររសៈ
ជាតម្លៃដែលកវីប្រើនូវការបង្ហាញពីលក្ខណៈអាកប្បកិរិយា
ចិត្តក្លាហានរបស់តួអង្គក្នុងការប្រយុទ្ធ ដោយកាយ វាចា ចិត្តចំពោះអំពើមិនល្អណាមួយ។
-ទារុណរសៈ
ជាតម្លៃដែលកវីប្រើនូវការបង្ហាញឱ្យឃើញនូវសកម្មភាពប្រយុទ្ធ ការព្យាបាទសងសឹក ជិះជាន់
រំលោភបំពាន ធ្វើទោសទណ្ឌកម្មយ៉ាងឃោរឃៅអស្ចារ្យរហូតបាត់បង់ជីវិត។
-នាដ្យរសៈ
ជាតម្លៃដែលកវីធ្វើឱ្យលេចចេញនូវលក្ខណៈកម្សត់ នៅក្នុងទំនាស់វិបត្តិ
ទំនាស់ប្រឆាំងរវាងគូបដិបក្ខ ដែលមានកម្លាំង និងសមត្ថភាពប្រហាក់ប្រហែលគ្នា។
-ហាសរសៈ
ជាតម្លៃដែលកវីប្រើនូវការបង្ហាញលក្ខណៈសកម្មភាព ចលនារឿងរបស់តួអង្គមានភាពកំប្លែង
ធ្វើឱ្យអ្នកអាន អ្នកស្ដាប់ អ្នកទស្សនាសប្បាយរីករាយ ផ្ទុះសំណើច ជ្រះថ្លាចិត្ត
អបអរសាទរ។
-សោភ័ណរសៈ
ជាតម្លៃល្អដែលកវីប្រើការបង្ហាញប្រកបដោយទេពកោសល្យខ្ពស់ទាំងផ្នែកអត្ថន័យ (ប៉ិនចោទ
ប៉ិនស្រាយ) និងអត្ថរូប (ពីរោះស្ដាប់ និយាយខ្លី ងាយយល់ មានភាពទាក់ទាញ)
នៅក្នុងដំណើររឿង។
-ទស្សនីយរសៈ
ជាតម្លៃដែលកវីប្រើនូវការបង្ហាញរៀបរាប់ទេសភាព ធម្មជាតិ ព្រៃព្រឹក្សា មច្ឆា
បក្សាបក្សី ប្រកបដោយសូរសព្ទពីរោះរណ្ដំណែងណង បង្កើតបានជាបរិយាកាសមួយ ធ្វើឱ្យ
អ្នកអាន
អ្នកស្ដាប់ រំភើបរីករាយ ជក់ចិត្តដិតអារម្មណ៍។
៣. សព្វរសៈ ជាតម្លៃទូទៅ
ដែលកវីយកមកប្រើក្នុងស្នាដៃរបស់ខ្លួន។ សព្វរសមានដូចជាៈ
-តថរសៈ
តម្លៃដែលកវីលើកយកតួអង្គ និងបញ្ហាជាក់ស្ដែង នៅក្នុងសង្គមមកតាក់តែងឱ្យឃើញជាក់ច្បាស់
ងាយយល់ ងាយស្ដាប់ ចាប់សេចក្ដីបានដូចជា
ទំនាស់ ការគ្រប់គ្រងសង្គម ជំនឿ ទំនៀមទម្លាប់ ប្រពៃណី សាសនាជាដើម។
-អច្ឆរិយរសៈ
តម្លៃដែលកវីប្រើនូវការបង្ហាញពីលក្ខណៈសកម្មភាពអស្ចារ្យ តួអង្គអរូបី ជាទេវៈ
សត្វចេះនិយាយ មនុស្សចេះហោះហើរ ដើរលើអាកាស ប្រែកាឡាបែងភាគ...។
-កុសលរសៈ
តម្លៃដែលកវីប្រើនូវការអប់រំទូន្មាន ប្រៀនប្រដៅចំពោះមនុស្សទូទៅ តាមរយៈអត្ថន័យ
របស់អត្ថបទ ឬសកម្មភាពរបស់តួអង្គជាដើម។
No comments:
Post a Comment